ဧရာဝတီတိုင်းရှိ ကျေးရွာပေါင်း(၇၀)ခန့်တွင် ရှားပါးကြိုးကြာငှက်နှင့် ဇီဝမျိုးစုံမျိုးကွဲများ ထိန်းသိမ်းရေးဟောပြောမည်

ဧရာဝတီတိုင်းဒေသကြီး၏ မြို့နယ်(၄)မြို့နယ်အတွင်းမှ ကျေးရွာပေါင်း (၇၀)ခန့်တွင် ရှားပါးကြိုးကြာငှက်နှင့် ဇီဝမျိုးစုံမျိုးကွဲများ ထိန်းသိမ်းရေးဟောပြောမူများ ပြုလုပ်သွားမည်ဖြစ်ကြောင်းသတင်းရရှိသည်။

ဧရာဝတီတိုင်းဒေသကြီး၏ မအူပင်မြို့နယ်၊ ပန်းတနော်မြို့နယ်၊ ၀ါးခယ်မမြို့နယ်နှင့် အိမ်မဲမြို့ နယ် စသော မြို့နယ်အတွင်းရှိ ကျေးရွာပေါင်း ၇၀ခန့်တွင် သစ်တောဦးစီဌာန၊ မိန်းမလှကျွန်းတောရိုင်းတိရစ္ဆာန် ဘေးမဲ့တောက တာဝန်ရှိသူများ၊ မအူပင်တက္ကသိုလ်၊ စိုက်ပျိုးရေးဌာန၊ အထွေထွေအုပ်ချုပ်ရေးဦးစီဌာန နှင့် သားငှက်ထိန်းသိမ်းရေးအဖွဲ့ (မြန်မာနိုင်ငံအစီအစဉ်)တို့ ပူးပေါင်း၍ ယင်းဒေသတွင် ပျံနှံနေထိုင်ကြသော ကြိုးကြာငှက်များနှင့် ဇီဝမျိုးစုံမျိုးကွဲများ ထိန်းသိမ်းနိုင်ရေး ဟောပြောသွားမည်ဖြစ်ကြောင်း မိန်းမလှကျွန်းတောရိုင်းတိရစ္ဆာန်ဘေးမဲ့တော အုပ်ချုပ်ရေးမှူးဦးဇော်ထူးအောင်က ပြောသည်။

“သူတို့ကျင်လည်ကျက်စားတဲ့ ကျေးရွာအနီးပတ်ဝန်းကျင်ကို ကျွန်တော်တို့ကထိန်းသိမ်းရေးတွေမှာ သူတို့ကိုယ်တိုင်ပါဝင်လာဖို့ အသိပညာပေးဟောပြောဖို့ ရှိပါတယ်။ ဇီဝမျိုးစုံမျိုးကွဲတွေ ထိန်းသိမ်းကာကွယ်တာနဲ့ ပတ်သက်ပြီး ဒေသခံပြည်သူတွေ အသိပညာတိုးလာအောင် ဘာကြောင့် ကာကွယ်ရတယ်၊ ဘယ်လိုဥပဒေေ တွနဲ့ ကာကွယ်ထားတယ်။ဥပဒေအရ ဘယ်လိုကာကွယ်ထားသလဲဆိုရာမှာ သာမန်ကာကွယ်ထားတာလား၊ ရာသီအလိုက်ကာကွယ်ထားသလား၊ လုံးဝကာကွယ်ထားသလား စသဖြင့် ဟောပြောသွားဖို့ ရှိပါတယ်” ဟု ၄င်းက ပြောသည်။

အဆိုပါ ဟောပြောပွဲတွင် ကြိုးကြာငှက်နှင့် ဇီဝမျိုးစုံမျိုးကွဲများ၏ ရှားပါးအရေးပါမူများ သိရှိနိုင်ရေး၊ အသိုက်ဆောက်လုပ်သော နေရာများကို ပိုမိုသိရှိ ဖော်ထုတ်နိုင် ရေး၊ ရေရှည်ထိန်းသိမ်းရေးလုပ်ငန်းများတွင် ဒေသခံများ၏ ပူးပေါင်းပါဝင်လာရေး ယခု ကျေးရွာပေါင်း(၇၀) ဟောပြောမူတွင် ပြုလုပ်သွားမည်ဖြစ်ကြောင်း၊ ယင်းကျေးရွာများမှာ ကမ္ဘာ့ရှားပါးကြိုးကြာငှက်များ အဓိက ပျံနှံ ကျက်စားသော ဒေသ၊ အသိုက်ဆောက်လု ပ်သော ဒေသများ ဖြစ်ကြောင်း သားငှက်ထိန်းသိမ်းရေးအဖွဲ့(မြန်မာနိုင်ငံအစီအစဉ်)၊ ဧရာဝတီမြစ်ဝှမ်း ဒေသထိန်းသိမ်းရေးတာဝန်ခံ ဦးနိုင်လင်းက ပြောသည်။

သားငှက်ထိန်းသိမ်းရေးအဖွဲ့(မြန်မာနိုင်ငံအစီအစဉ်)မှ ငှက်ပညာရှင်ဦးသက်ဇော်နိုင် က ဧရာဝတီမြစ် ၀ကျွန်ပေါ်ဒေသရှိ ကြိုးကြာငှက်မျိုးစိတ်သည် ကမ္ဘာပေါ်တွင်သာမက မြန်မာနိုင်ငံတွင်လည်း  မျိုးသုဉ်းရန် အန္တရာယ်ကျရောက်နိုင်သော မျိုးစိတ်ဖြစ်ပြီး ယခုအချိန်တွင် ကြိုးကြာငှက်များသည် အကောင်ရေ ၂၀၀ မှ ၄၀၀ အတွင်းသာ ကျန်ရှိတော့ပြီး တစ်နိုင်ငံလုံးတွင် အကောင်ရေမှာ ၅၀၀ ခန့်ပင် ကျန်ရှိတော့ကြောင်း ပြောသည်။

ကြိုးကြာငှက်များသည် ၁၉၉၄ခုနှစ် တောရိုင်းတိရစ္ဆာန်နှင့် သဘာဝအပင်များ ကာကွယ်ရေးနှင့် သဘာဝနယ်မြေများ ထိန်းသိမ်းရေးဥပဒေအရ လုံးဝကာကွယ်ထားသည့် တောရိုင်းတိရစ္ဆာန်များ စာရင်းတွင် ပါဝင်ကြောင်းသိရသည်။

By | 2017-07-17T12:12:54+00:00 July 17th, 2017|Upper Ayeyawady, Birds, Reptiles, WCS Myanmar|0 Comments

About the Author:

Leave a Reply