သန့်ရှင်းသော ပျံသန်းသူ သို့မဟုတ် လင်းတ မြီးရင်ဖြူ

”လင်းတမှိုင် မှိုင်သည်”၊ ”စာသူငယ်ကြား လင်းတ နားသကဲ့သို့” စသဖြင့် သူတို့ကို ”လန်းဆန်းတက်ကြွမှု မရှိခြင်း”၊ ”ကြီးမား၍ အကျည်းတန်သော ငှက်”အဖြစ် ကျယ်ကျယ်ပြန့်ပြန့် ခိုင်းနှိုင်းပြောဆိုကြသည်။ အပုပ် အသိုးနှင့် အသေကောင်တို့ကို စားသောကြောင့် အောက် လမ်း၊ မကောင်းဆိုးရွား စသည်တို့နှင့် ဆက်စပ်မှုရှိသော ”ငှက်” အဖြစ်လည်း လူတွေက ကြောက်လန့်ရွံရှာကြသည်။ ”ကျက်သရေမင်္ဂလာမရှိသော ငှက်”အဖြစ်လည်း သတ် မှတ်ထားကြသည်။

 

ထိုငှက်ကိုပင် မြန်မာအများစုက အတိတ်ဆိုး၊ နိမိတ် ဆိုး၏ ရှေ့ပြေးအဖြစ် ရိုးရာအစဉ်အလာအတိုင်း လက်ခံ ယုံကြည်ထားကြသည်။ ဆိုရလျှင် အိမ်မြှောင် စုတ်ထိုး ခြင်း၊ မကောင်းသော အိပ်မက်မက်ခြင်း၊ ငှက်ဆိုးထိုး ခြင်း၊ ရွာအတွင်းသို့ တောတိရစ္ဆာန်ဝင်ခြင်းများကဲ့သို့ပင် ထိုငှက်တို့ ခေတ္တလာရောက်နားခိုပါက ”အတိတ်နိမိတ် ဆိုး”အဖြစ် လက်ခံထားကြဆဲဖြစ်သည်။ ထိုသို့ လွဲမှား သော ယုံကြည်မှုများက သူတို့ကို မျိုးသုဉ်းလုနီးပါး အခြေ အနေသို့ တွန်းပို့နေပါသည်။

ခြိမ်းခြောက်မှုများဖြစ်ပေါ်

ထိုငှက်မျိုးစိတ်မှာ လင်းတငှက် ဖြစ်သည်။ လင်းတငှက် တို့သည် တစ်နေရာရာတွင် ခေတ္တနားခိုသည်မှာ အစား တစ်ခုခုမြင်၍ သို့မဟုတ် အခြားအကြောင်းတစ်ခုခု ကြောင့်လည်း ဖြစ်နိုင်သည်ဟူ၍ အစဉ်အလာကို ဖောက် ထွက်၍ ယုံကြည်သူနည်းပါသည်။ ထိုသို့ ယုံကြည်သူ နည်းပါးမှုက လင်းတများအပေါ်တွင် ခြိမ်းခြောက်မှုများ ဖြစ်ပေါ်လာနေပါသည်။

မြန်မာနိုင်ငံတွင် များစွာသော ငှက်မျိုးစိတ်များ၊ တောရိုင်းတိရစ္ဆာန်များ မျိုးသုဉ်းခဲ့ရမှု ဖြစ်စဉ်တွေ ရှိပါသည်။ သာဓကပြရလျှင် မြန်မာနိုင်ငံတွင် ရှင်သန် ကျက်စားခဲ့သော ဘဲခေါင်းပန်းရောင် (Pink-headed Duck) မှာ ၁၉၅ဝ ဝန်းကျင်ကတည်းက ကမ္ဘာမြေပေါ်မှ ပျောက်ကွယ်သွားခဲ့ပါပြီ။ ယခုအချိန်တွင် မျိုးသုဉ်းလုနီး ပါး အန္တရာယ်နှင့် ရင်ဆိုင်နေရသော သားငှက်တိရစ္ဆာန် မျိုးစိတ်အရေအတွက် များစွာထဲတွင် လင်းတငှက်မျိုးစိတ် အချို့လည်း ပါဝင်နေပါပြီ။ ကမ္ဘာအရပ်ရပ်ရှိ အချို့နိုင်ငံ များတွင် လင်းတငှက်အမျိုးမျိုးမှာ အခြားသားငှက်များ နည်းတူ မျိုးသုဉ်းသွားခဲ့ပြီဖြစ်သည်။

ကမ္ဘာပေါ်တွင် လင်းတ မျိုးရင်း၊ မျိုးစိတ်ပေါင်း များစွာ ရှိသော်လည်း မျိုးခွဲနှစ်မျိုးသာ ဖြစ်ပါသည်။ တစ်မျိုးမှာ သိမ်း၊ စွန်၊ လင်းယုန် အနွယ်ဝင်ဖြစ်သော ”ကမ္ဘာဟောင်း လင်းတ” (Falconiformes or Old World Vultures) နှင့် အခြားတစ်မျိုးမှာ ခရုတုတ်၊ ငှက်ကျားစသည့် ရေငှက်ကြီးများနှင့် အမျိုးတော်သူ ”ကမ္ဘာသစ် လင်းတ” (Ciconiiformes or New World Vultures) ဖြစ်ပါ သည်။

မြန်မာနိုင်ငံတွင် လက်ရှိ ကျက်စားသော လင်းတမျိုး စိတ် ခြောက်မျိုးရှိသည်။ လင်းတမျိုးစိတ် သုံးမျိုးမှာ ဆောင်းခိုငှက် (Migrating Bird) ဖြစ်သည်။ ကျန် သုံးမျိုးမှာ ဌာနေငှက်မျိုးရင်း (Resident Bird) ဖြစ်ပြီး ကမ္ဘာပေါ်တွင် မျိုးသုဉ်းလုနီးပါး အန္တရာယ်ရှိသော မျိုး စိတ် (Critical Endangered)အဖြစ် ရင်ဆိုင်နေရ
ပါပြီ။

ထိုလင်းတမျိုးစိတ်သုံးမျိုးမှာ (က) လင်းတမြီးရင်ဖြူ (White-rumped Vulture Gyps bangalensis)၊ (ခ)နှုတ်သီးလုံးချော လင်းတ (Slender-billed Vulture Gyps tenuirostris) နှင့် ဦးခေါင်းနီလင်းတ (Red-headed Vulture Aegypius clvus) တို့ဖြစ်ပြီး ယင်းတို့အနက် လင်းတမြီးရင်ဖြူ မျိုးစိတ်အကြောင်းကို တင်ပြချင်ပါသည်။

အထနှေးကွေး

လင်းတမြီးရင်ဖြူသည် အထနှေးကွေးသော ငှက်မျိုး စိတ်ဖြစ်ပြီး သင့်တော်သော အပူချိန်ရှိမှသာ ပျံဝဲ၍ အစာ ရှာသည်။ လေဟုန်စီးပျံဝဲနေသောအချိန်တွင် မြင်ရသော အသေကောင်ကို အောက်သို့ ထိုးဆင်း၍ စားလေ့ရှိသည်။ ထိုလင်းတသည် အစာရှိရာ ဝန်းကျင်ရှိ သစ်ပင်ကြီးများ တွင် နားလိုက်၊ အောက်သို့ ထိုးဆင်း၍ စားလိုက်ဖြင့် လုပ်လေ့ရှိသည်။ လူသူ အနှောင့်အယှက်များရှိပါက လည်း မစားဘဲ နီးစပ်ရာသစ်ပင်ကြီးများပေါ်တွင် ညအိပ် နားလေ့ရှိသည်။ ဆောင်းရာသီဆိုလျှင် မြူများ ဆိုင်းနေ ပါက မြူကင်းရှင်း၍ နေရောင်ခြည် ကောင်းစွာရသော အချိန်ရောက်မှ နီးစပ်ရာ သစ်ပင်ပေါ်ကဆင်း၍
စားသည်။ အစာစားပြီးချိန်တွင် အနီးအနား၌ ရေအိုင်၊ ချောင်း၊ မြောင်းတို့ရှိပါက ရေချိုး၊ ရေသောက်ခြင်း အလေ့အထလည်း ပြုလုပ်သည်။

အသိုက်ကိုလည်း အလွန်မြင့်မားသော သစ်ပင်ကြီး များပေါ်တွင် သစ်ကိုင်း၊ သစ်ရွက်တို့ဖြင့် ဆောက်လုပ် လေ့ရှိသည်။ အများအားဖြင့် သူတို့ နေထိုင်ကျက်စားသော ဝန်းကျင်အနီးမှ လူသူအရောက်အပေါက်နည်းသော သစ်ပင်များ၊ ချောက်ကမ်းပါးမြင့်များတွင် အသိုက်ပြု လုပ်ခြင်းဖြစ်သည်။

လင်းတမြီးရင်ဖြူတို့သည် အောက်တိုဘာလမှ ဧပြီလ အတွင်း မျိုးပွားကြပြီး လင်းတတစ်စုံအတွက် အသိုက် တစ်သိုက်တွင် ဥတစ်လုံးသာ အု၍ တစ်ကောင်သာ ပေါက်ပါသည်။ အကောင်ပေါက်ကလေးများသည် မေ သို့မဟုတ် ဇွန်လခန့်တွင် အတောင်စုံ၍ မိဘများနှင့်အတူ အစာရှာ ထွက်နိုင်သည်။ အကောင်ပေါက်များ (Juvenile) အရွယ်ရောက်၍ အကောင်ကြီးအဆင့် (adult vulture)ရောက်ရန် သုံးနှစ်မှ လေးနှစ်အထိ ကြာမြင့်သည်။ ထို အချိန်ရောက်မှ မိတ်လိုက်ခြင်း၊ မျိုးပွားခြင်း တာဝန်ကို ထမ်းဆောင်နိုင်ကြသည်။

ပေါများစွာတွေ့နိုင်

လင်းတမြီးရင်ဖြူကို မြန်မာ၊ ပါကစ္စတန်၊ အိန္ဒိယ၊ ဘင်္ဂလားဒေ့ရှ်၊ နီပေါ၊ ဘူတန်၊ ထိုင်း၊ လာအို၊ ကမ္ဘော ဒီးယား၊ ဗီယက်နမ်၊ အာဖဂန်နစ္စတန်နှင့် အီရန်နိုင်ငံတို့ တွင်လည်းတွေ့နိုင်သည်။ ယခင်က တရုတ်နှင့် မလေးရှား နိုင်ငံတို့တွင် တွေ့နိုင်သော်လည်း လက်ရှိတွင် မျိုးသုဉ်း ပျောက်ကွယ်သွားပြီဟု ယူဆရသည်။ မြန်မာနိုင်ငံတွင် ရှေးယခင်က နိုင်ငံတစ်ဝန်းတွေ့နိုင်သော်လည်း ယခု အချိန်တွင် မြောက်ပိုင်း(ကချင်ပြည်နယ်)၊ အနောက်ပိုင်း (ရခိုင်နှင့် ချင်း) နှင့် ရှမ်းပြည်နယ် မြောက်ပိုင်းတွင်သာ တွေ့ရတော့သည်။ မြန်မာနိုင်ငံ မြောက်ပိုင်း ဟူးကောင်း ဒေသနှင့် အင်းတော်ကြီးဒေသတစ်ဝိုက်တွင်တော့ ပေါများစွာ တွေ့နိုင်ပါသေးသည်။

လင်းတငှက်များကို ရှေးယခင်က ပေါများစွာ တွေ့ရှိရ ပြီး ယခုအခါ လွန်စွာရှားပါးလာခြင်းမှာ သူတို့နေထိုင်ရာ ဒေသများ ပျက်စီးဆုံးရှုံးလာခြင်း၊ သူတို့ အသိုက်ဆောက် မျိုးပွားသော အပင်များ ဖျက်ဆီးခံရခြင်း(တောင်ယာခုတ်၊ တောမီးရှို့၊သစ်ထုတ်)၊ လူတို့၏ အကြောင်းအမျိုးမျိုး ကြောင့် (ဖမ်းဆီးသတ်ဖြတ် ခံရခြင်း၊ အဆိပ်သင့် သေဆုံး သော အကောင်များကို စားသုံးမိခြင်း) သေဆုံးခြင်းတို့ ဖြစ်သည်။

သာဓကတစ်ခုမှာ အိန္ဒိယ၊ နီပေါနှင့် တချို့နိုင်ငံများတွင် ကျွဲ၊ နွားရောဂါ ကာကွယ်ဆေး (အရောင်ကျဆေး)အဖြစ် အသုံးပြုသောDeclofenac (non-steroidal anti-inflammatory drug) ဆေးများကြောင့် လင်းတ အများအပြား သေဆုံးခဲ့သော ဖြစ်ရပ်များ ရှိပါသည်။ ယင်းဆေးထိုးထားသော ကျွဲ၊ နွား အသေများကို လင်းတ များ စားသုံးမိရာက ကျောက်ကပ်များ ပျက်စီးကာသေဆုံး ခြင်းဖြစ်သည်။

လင်းတငှက်များသည် အပုပ်၊အသိုးများကို စားသော ကြောင့် လူအများစုသည် ”ရွံရှာဖွယ်ကောင်းသော ငှက်၊ အတိတ်နိမိတ် မကောင်းသော ငှက်”အဖြစ် ရှေးယခင် မှစ၍ ယခုအချိန်အထိ ထင်မြင်နေကြဆဲဖြစ်သည်။ အမှန်မှာ လင်းတများသည် လူသားများ၏ လူမှုရေး၊ စီးပွားရေး၊ ကျန်းမာရေး စသည်တို့ကို နှောင့်ယှက်ဖျက်ဆီး ခြင်း မရှိဘဲ လူသားတို့အတွက် ရောဂါဖြစ်လာနိုင်သော အပုပ်အသိုး၊ အနံ့အသက်များကို ရှင်းလင်းပေးခြင်းဖြင့် ”ကျေးဇူးပြုသော ငှက်” ဖြစ်သည်။

မိတ်ဆွေငှက်

လင်းတများကဲ့သို့ လူအများ သတ်မှတ်ထားသော ငှက်ဆိုးဟု ခေါ်သည့် လင်ကောင်ပိုး (ခေါ်) မိန်ကို ဒုနိ မတ္တိ (နိမိတ်မကောင်းသော ငှက်) အဖြစ် သတ်မှတ်ထား ကြသည်။ အမှန်မှာထိုငှက်သည် လယ်သမားတို့၏အဓိက ရန်သူဖြစ်သော ကြွက်တို့ကို ကျယ်ကျယ်ပြန့်ပြန့်သုတ်သင် ပေးသော ”မိတ်ဆွေငှက်”သာ ဖြစ်သည်။

ဤသို့ ငှက်များကို အတိတ်နိမိတ်မကောင်းသော ငှက် အဖြစ် ထင်မြင်သတ်မှတ်ခံနေရခြင်းများသည် လင်းတ ငှက်မျိုးများအပါအဝင် ငှက်များ လျော့နည်းလာရခြင်း၏ အဓိကအချက်ဖြစ်ပါသည်။

ကချင်ပြည်နယ်ရှိ လင်းတများ ကျက်စားရာ တစ်ဝိုက် က ဒေသခံများကို မေးမြန်းကြည့်ရာ အများမှာ လင်းတ များကို ”နိမိတ်မကောင်းသော ငှက်”အဖြစ် မယူဆဘဲ ”ကျေးဇူးရှင်ငှက်”ဟု သတ်မှတ်ထားကြသည်။အကြောင်း မှာ ဒေသခံတို့၏ လယ်ယာများတွင် သေဆုံးနေသော ကျွဲ၊ နွားများကို ရှင်းပေးခြင်းဖြင့် ကူညီ၍ ဖြစ်သည်။ ထို ဒေသမှ ဒေသခံများသည် ကျွဲ၊ နွားများကို အမှတ်အသား ထား၍ တောထဲတွင် လွှတ်ထားလေ့ရှိသည့်အတွက် လင်းတများ ကောင်းကင်တွင် ပျံဝဲနေသည်ကို ကြည့်ကာ မည်သူ့ကျွဲ၊ နွားသေဆုံးနေသည်ကို သိရှိကြသည်။

မိတ်ဆွေကဲ့သို့ သဘောထား

ထို့ကြောင့် ကချင်ပြည်နယ်တွင် ဒေသခံများက လင်းတများအပေါ် မကောင်း မမြင်ခြင်း၊ အနှောင့်
အယှက်မပေးခြင်း၊ မိတ်ဆွေကဲ့သို့ သဘောထားခြင်းတို့ ကြောင့် အခြားဒေသများထက် ပေါများစွာ ကျန်ရှိနေခြင်း ဖြစ်သည်။

လင်းတမြီးရင်ဖြူသည် ယခင်က ကမ္ဘာပေါ်၌အကောင် ရေ သန်းချီရှိနိုင်သော်လည်း ၁၉၉ဝ ပြည့်နှစ် နောက်ပိုင်း တွင် သေကျေပျက်စီးမှု အလွန်များပြားလာခြင်းကြောင့် အကောင်ရေလျင်မြန်စွာ ကျဆင်းလာခဲ့ရာ ယခုအချိန် တွင် ၂၅၅ဝ မှ ၉၉၉၉ အတွင်းသာ ကျန်ရှိတော့သည်။ထို့ကြောင့် ၅နှစ်မှ ၁ဝ နှစ်အတွင်း စနစ်တကျ ထိန်းသိမ်း ကာကွယ်မှုများ မပြုလုပ်လျှင် လုံးဝပျောက်ကွယ်သွား နိုင်သည်ဟု ကမ္ဘာ့ငှက်ပညာရှင်များက ခန့်မှန်းထားသည်။

သို့ဖြစ်၍ ထိုငှက်မျိုးစိတ်ရှိသော နိုင်ငံများသည် အပြည်ပြည်ဆိုင်ရာ အဖွဲ့အစည်းများနှင့် ပူးပေါင်း၍ ထိန်းသိမ်းရေးလုပ်ငန်းများကို နည်းလမ်းပေါင်းစုံဖြင့် ပြုလုပ်နေကြပါပြီ။ မြန်မာနိုင်ငံတွင်လည်း လင်းတ
ထိန်းသိမ်းရေး လုပ်ငန်းများကို သက်ဆိုင်ရာအဖွဲ့အစည်း များက ပြုလုပ်နေပါသည်။

ထိန်းသိမ်းကာကွယ်

လင်းတများကို ကျွဲ၊ နွား အသေကောင်များ ကျွေးခြင်း၊ ယင်းတို့၏ အစားအစာများကို ဖြည့်ဆည်းပေးခြင်း၊ အကောင်အရေအတွက် စာရင်းကောက်ယူခြင်း၊ မျိုးပွား ကျက်စားရာ ဒေသများကို ရှာဖွေဖော်ထုတ်၍ သုတေသန ပြုလုပ်ခြင်း၊ ဒေသခံများအား လင်းတငှက်များ အပေါ် ထိန်းသိမ်းရေးအမြင်တိုးပွားလာစေရန် ပညာပေး အစီ အစဉ်များ ပြုလုပ်နေပါပြီ။ ဒေသခံများနှင့် ပူးပေါင်း၍ မျိုးပွားကျက်စားရာ နေရာများကို ကာကွယ်ထိန်းသိမ်း ခြင်း လုပ်ငန်းများပြုလုပ်၍ ရှားပါးလာသည့် လင်းတငှက် များ မျိုးသုဉ်းပျောက်ကွယ်မသွားစေရန် ထိန်းသိမ်း ကာကွယ်ရေး ဆောင်ရွက်နေပါပြီ။

သို့ကြောင့် လင်းတငှက်များသည် အခြားအဖိုးတန် သယံဇာတများနည်းတူ သဘာဝတရားကြီးမှ လူသားများ အတွက် ပေးထားသော အမွေပစ္စည်းတစ်ခုဖြစ်၍ ထို အမွေပစ္စည်း မပျောက်ပျက်အောင် ထိန်းသိမ်းစောင့် ရှောက်ရန် လူသားအားလုံးတွင်လည်း တာဝန်ရှိပါကြောင်း တင်ပြလိုက်ရပါသတည်း။

နိုင်လင်း

WCS Myanmar

By | 2018-03-28T14:56:08+00:00 March 28th, 2018|Uncategorized|0 Comments

About the Author:

Leave a Reply